Learn About 2-MBADD
► 2MBADD Home

General Information
► English
► Hmong

History
► English
► Hmong

Protein and Isoleucine
► English
► Hmong

Carnitine & Low Protein Diet
► English
► Hmong

Genetics
► English
► Hmong

Ongoing Research
► English
► Hmong

Links
Information for Physicians

Download this booklet (pdf*)

*Download the latest version of Adobe Reader

Thaum uas koj hnov txog tus mob 2-MBADD thawj zaug tej zaum koj yuav yoob me ntsis. Puas muaj leej twg hnov txog tus mob no dua li? Thaum Hmoob tseem nyob Nplog Teb los Thaib Teb peb yeej tsis tau hnov txog tus mob no li. Qhov no vim yog yeej tsis tau paub txog tus mob 2-MBADD dua li ua ntej xyoo 1999 thiab cov txuj uas siv los soj ntsuam kuaj txog tus mob no twb tsis tau muaj. Vim tsis tau paub txog hom mob no hauv lub teb chaws koj tau nyob mas thiaj tsis muaj npe ua lus Hmoob txog tus mob no.

Phau ntawv no yuav pab koj kawm txog ntau yam uas koj yuav tsum tau paub kom koj thiaj paub tu koj tus me nyuam uas muaj tus mob 2-MBADD ua yog los ntawm noob caj noob ces hauv tsev neeg los. Phau ntawv no yuav pias txog tias yog ib yim neeg uas muaj ib tug me nyuam muaj tus mob 2-MBADD no yuav ua lub neej zoo li cas thiab yuav muaj dab tsi tshwm sim rau lawv tsev neeg. Yim neeg peb pias txog no yog ib tus piv txws xwb tsis yog peb muab ib yim neeg uas muaj tus me nyuam ua muaj tus mob no los pias. Kuj yog ib tug piv txwv uas yuav tshwm sim tau rau ib yim Hmoob thiab. Koj yuav ua siab loj thiab tso siab hais tias cov kws kho mob yuav pab kho kom koj tus me nyuam hlob thiab tau txais kev noj qab nyog zoo.

Kev Tsiv Teb Tsaws Chaw tuaj rau As Mes Lis Kas Teb
Thaun Dib nyuam qhuav muaj 19 xyoos xwb ces lawv yuav tau rov tsiv dua. Nws tsis nco qab thaum nws tsev neeg tsiv thawj zaug tim Thaib Teb tuaj nyob rau nruab nrab hauv lub xeev California, vim thaum ntawd nws nyuam qhuav muaj peb xyoos xwb. Dib lub neej ua me nyuam yaus kuj nyob nrog cov neeg txheeb ze thiab cov phooj ywg Hmoob. Vim nws kawm lus As Kiv tau zoo, nws kuj tau pab txhais lus rau nws tsev neeg thiab tej phooj ywg.

Tsiv dua
Dib pab txhais lus rau nws tsev neeg thiab tej phooj ywg tau ntau xyoo, ua li mas, nws nws xav mus kawm ua ib tug xib hwb qhia ntawv rau cov neeg hais ob hom lus. Thaum Dib mus kawm ntawv qib siab thawj xyoo, nws ntsib ib tug tub hluas zoo. Nws lub npe hu ua Ntaj no. Tsis ntev ces nkawv txawm sib sau ua neej. Thaum nkawd sib yuav tas nkawv tham txog yuav xav tsiv mus nyob rau lub xeev Wisconsin. Dib paub hais tias nyob rau Wisconsin kuj muaj Hmoob coob thiab tej zaum lawv kuj yuav txais nkawv; tsis tas li, kuj muaj ntau lub tsev kawm ntawv qib siab uas nws yuav rov mus kawm ntawv ntxiv tau. Nkawd nrog cov txwj laus neeg tham ces lawv kuj pom zoo rau Dib thiab Ntaj nkawv los mus nyob rau Wisconsin.

Ob niam txiv nyuam qhuav sib yuav tsiv los nyob rau Wisconsin
Tom qab Ntaj nkawd nrog tus txiv ntxawm tsev neeg nyob tsis ntev, nkawd tau tawm mus ntiav tsev nkawd nyob nkawd lawm. Dib nrhiav tau ib txoj hauj lwm qhia ntawv rau cov me nyuam kawm ntawv hais ob hom lus (ESL) uas muaj qhia rau ntau lub tsev kawm ntawv hauv lub nroog nkawd nyob. Ntaj kuj ua hauj lwm pab lawv tsev neeg qhov chaw ua lag luam. Nkawv tsis khoom li los nkawd kuj zoo siab. Tej thaum nkawd kuj nkees thiab sab kawg.

Tsis ntev Dib paub hais tias vim li cas nws ho nkees tshaj yav tas los, yog vim nws xeeb tub lawm! Dib mus kuaj nws plab me nyuam thiab coj raws nraim li tus kws kho mob qhia kom nws uas, xws li, nws yuav tsum noj haus kom zoo, noj cov tshuaj vitamins, siv sij hawm los so kom txaus thiab mus ntsib tus kws kho mob kuaj nws plab me nyuam kom tsis tu ncua. Nws xav ua txhua yam li nws ua tau kom tau ib tug me nyuam hlob zoo. Cov duab yees tsom tus me nyuam hauv plab kuj pom tias tus me nyuam loj hlob zoo

Tus menyuam mos yug los
Peb lub lis piam tom qab tsev kawm ntawv so rau lub caij ntuj sov Dib yug tau ib tug me nyuam ntxhais. Ntaj kuj zoo siab kawg. Nws qhia rau ob peb tug neeg txheeb ze tuaj mus xyuas nws tus me nyuam tim tsev kho mob. Lawv kuj foom lus zoo rau lawv tsev neeg kom tsuas tau txais kev noj qab nyob zoo. Nkawv tis tus menyuam npe hu ua Maiv uas yog ib lub npe Hmoob.

Thawj peb hnub, Maiv kuj noj mis thiab pw tsaug zoo xws li txuas tus me nyuam mos. Tsuas yog lub caij uas cov kws kho mob los kuaj xyuas nws mas nws thiaj tsim. Lawv kuj tau coj Maiv mus hnov ib qho ntshav me me ntawm qab xib taws coj mus kuaj. Dib kuj tau nyeem ib daim ntawv qhia txog kev soj ntsuam kuaj cov me nyuam mos nyob rau hauv lub xeev Wisconsin. Xyoo ntawd, lub xeev Wisconsin tau txhab kev soj ntsuam kuaj me nyuam mos txog cov mob muaj raws caj ces hauv tsev neeg no kom dua 48 tus mob. Txoj kev soj ntsuam no mas yuav pab thiab nrhiav kev kho cov menyuam no ua ntej lawv muaj cov tsos mob nhyav tshwm sim chiv ntawm tus mob los.

Dib kuj tsis xav ntau txog qhov no vim daim ntawv qhia tias cov mob no kuj tsis pom muaj tshwm sim ntau. Hnub tom qab nkawv ob niam tub tawm hauv tsev kho mob mus tsev.

Ib tsab xov tooj txaus ceeb
Peb hnub tom qab Dib coj Maiv tim tsev kho mob los; nws tau txais ib tsab xov tooj tuaj ntawm Maiv tus kws kho mob. Tus kws kho mob qhia rau Dib txog Maiv qhov ntshav tau coj mus kuaj txog ntawm cov mob uas muaj raws noob caj noob ces hauv tsev neeg thaum Maiv tseem nyob tim tsev kho mob. Nws hais tias tsom pom muaj ib yam hauv Maiv cov ntshav uas qhia tias tej zaum nws yuav muaj ib hom mob. Nws hais kom Dib coj Maiv rov mus tom tus kws kho mob qhov chaw ua hauj lwm rov tso ib qho ntshav kuaj dua.

Dib kuj ntshai. Nws thiaj hu rau Ntaj tom chaw ua hauj lwm tam sim ntawd. Ntaj kuj nplij Dib. Nkawd tau tham thiab tso siab vim nkawd pom tias Maiv kuj noj taus mis thiab pw kuj tsaug zog zoo. Taig kis, Nkawd coj Maiv mus tom tus kws kho mob qhov chaw ua hauj lwm rov tso ntshav kuaj dua. Tus kws kho mob kuj hais rau nkawd kom ua siab loj.

Hnub tom qab, dib kuj tau txais ib tsab xov tooj hais tias Maiv qhov ntshav coj mus kuaj zaum no kuj tshwm tsis zoo (abnormal). Tus kws tu mob (nurse) tom tus kws kho mob qhov chaw ua hauj lwm hais rau Dib tias qhov no tsuas yog ib txoj kev soj ntsuam me me xwb, yuav tau kuaj kom tob mus ntxiv thiaj paub tias qhov teeb meem yog dab tsi tiag. Ua li mas, yuav tau coj Maiv mus kuaj rau hauv tsev kho mob loj nyob rau Madison, los yog, Milwaukee xwb.

Zaum no Dib txhawj heev lawm. Nws thiab Ntaj nrog cov txheeb ze tham ntev loo txog qhov teeb meem no. Nkawv tau hu mus rau nkawv niam thiab txiv kom pab tawm tswv yim thiab txhawb nkawd lub zog.

Tom Lub tsev kho mob tshwj xeeb
Maiv rov kuaj ntshav thiab kuaj zis dua rau tom lub tsev kho mob no. Qhov kuaj pom tshwm hauv Maiv cov ntshav muaj lub npe hu ua “organic acid”. Cov organic acid no mas tsuas kuaj pom tshwm rau cov neeg uas muaj tus mob lub npe luv hu ua 2-MBADD.

Cov kws kho mob tau pom hais tias tus mob 2-MBADD yog ib tug mob tshiab. Nyuam qhuav tshawb paub txog tus mob no thaum xyoo 1999 xwb. Ua ntej lub xeev Wisconsin txhab lawv txoj kev soj ntsuam kuaj cov me nyuam mos no mas tsuas paub hais tias muaj txog li plaub tus neeg hauv qab ntuj khwb no thiaj muaj tus mob 2-MBADD xwb. Kuj tau ceeb tias ua cas ob peb lub hlis tom qab pom muaj ntau tus me nyuam yug hauv lub xeev Wisconsin muaj tib yam organic acid hauv lawv cov ntshav li ntawm thiab. Cov me nyuam mos no yog me nyuam Hmoob nkaus xwb.
 

Thawj cov lus tseeb hais txog tus mob 2-MBADD
Xyoo 1999 yog thawj zaug uas peb tau muab tus mob 2-MBADD no qhia tawm tias:

• Tsuas muaj peb tug me nyuam muaj tus mob 2-MBADD. Cov me nyuam no yug los hauv ob tsev neeg. Ib tug yug hauv tsev neeg nyob teb chaws Yus Laus (Europe) hos lwm tus yug hauv tsev neeg nyob teb chaws Pas Khiv Xab Tham (Pakistan). Ob tug me nyuam tsis hlob zoo, cov nqaij pob txha tsis muaj zog, cov ntshav qab zib ntsawg thiab qaug dab peg. Tus me nyuam peb uas muaj tus mob 2-MBADD yog ib tug me nyuam ntxhais hauv ib tsev neeg no. Tom qab nws yug los, mas kuj tau kuaj pom muaj cov organic acid nyob hauv nws cov ntshav. Li nkawd, tus me nyuam no thiaj tau noj ib hom mis tshwj xeeb thiab tau ntxiv cov tshuaj hu ua carnitine no pab nws. Nws loj hlob zoo thiab tsis muaj cov tsos mob ntawm tus mob 2-MBADD.

• Cov me nyuam ua muaj tus mob 2-MBADD no yuav pom muaj tsos mob nhyav thaum lawv ho tau khaub thuas los yog ho muaj mob lwm yam ua rau lawv qhov ncauj tsuag tsis qab los.

• Kuj ceeb tias, tus neeg plaub uas muaj tus mob 2-MBADD yog ib tug menyuam uas muaj tus mob 2-MBADD no niam. Nws muaj cov organic acid hauv nws cov ntshav tiam sis nws kuj tsis muaj cov tsos mob tshwm sim ntawm tus mob. Li no mas, tsis yog txhua tus neeg uas muaj tus mob 2-MBADD yuav muaj tsos mob tshwm sim.

• Cov neeg uas muaj tus mob 2-MBADD no lub ces yuav zom tsis tau ib seem protein hu ua Isoleucine, xws li neeg lub cev yuav zom taus.

• Tus mob 2-MBADD yog ib tug mob uas muaj raws noob caj noob ces hauv tsev neeg.

Yog xav paub lub ntsiab kom tob dua txog tus mob 2-MBADD, cov protein, cov isoleucine, kev noj haus kom tsis muaj protein tsawg, ntxiv cov carnitine, thiab paub txog noob caj noob ces no ces saib rau ib ntus tom ntej nyob hauv phau ntawv no.

Cov tswv yim qhia txog kev ceev faj rau cov tsev neeg
Cov kws kho mob uas kho thawj cov me nyuam Hmoob uas muaj tus mob 2-MBADD mas xyuam xim thiab ceev faj txog txoj kev kho tus mob no. Lawv paub tias cov me nyuam uas muaj tus mob muaj ntsis thooj li tus mob 2-MBADD no mas yuav tau noj cov mis tshwj xeeb thiab muaj cov carnitine. Cov kws kho mob paub hais tias yog pab kho li no rau cov me nyuam uas muaj tus mob 2-MBADD, tej zaum kuj yuav pab tau cov me nyuam ntawd thiab ces lawv thiaj li pom zoo kho li ntawd rau cov me nyuam no thiab.

Dib thiab Ntaj nkawd kawm tov cov mis tshwj xeeb ntawd nrog cov carnitine rau Maiv noj. Maiv noj cov mis no kuj tsis muaj teeb meem dab tsi. Nkawd kuj tau kawm txog tias yog Maiv muaj mob thiab tau khaub thuas tej ne, nkawd yuav tu Maiv li cas.

Dib thiab Ntaj coj Maiv mus kuaj ib ob hlis twg ib zaug rau thawj lub xyoos saib nws loj hlob li cas, thiab noj li cas. Tej zaum kuaj ntshav thiab zis saib puas pom muaj organic acid.

Maiv kuj noj qab nyob zoo thiab loj hlob txij thaum mos liab mus txog ntua rau lub caij nws muaj hnub nyoog li ob xyoos lawm. Nws nyiam mus tim qhov chaw zov me nyuam ib lub lis piam twg ob peb zaug. Nws niam tais yawm txiv kuj tuaj California tuaj xyuas nkawv tus ntxhais xeeb ntxwv uas ntxim hlub.
 

Ib cov lus tshiab qhia txog tus mob 2-MBADD muaj rau cov me nyuam Hmoob
Plaub lub xyoos tom qab uas lub xeev Wisconsin tau txhab kev soj ntsuam kuaj cov menyuam mos, mas kuaj pom 25 tus me nyuam mos muaj tus mob 2-MBADD. Ib tug me nyuam thiaj tsis yog Hmoob, dua li ces yog me nyuam Hmoob tag. Kuj yog ib qho txaus ceeb heev! Tsis tas li, nyob hauv lub xeev Minnesota los kuj kuaj pom muaj tshaj 10 tus me nyuam muaj tus mob 2-MBADD. Ntau lub xeev kuj tseem tsis tau txhab lawv txoj kev soj ntsuam kuaj me nyuam mos kom duav kuaj tus mob 2-MBADD, li no, cov me nyuam yug rau cov xeev ntawd yuav paub tsis txog tus mob no.

Txij thaum kuaj tau cov me nyuam uas muaj tus mob 2-MBDD no mas kuj tau kawm ntau yam txog cov me nyuam ua muaj tus mob no.

• Kwv yees li ib tug ntawm 225 tus me nyuam Hmoob tej zaum yuav muaj tus mob 2-MBADD. Nyob hauv cov tsev neeg Hmoob mas yuav muaj tus mob 2-MBDD ntau dua lwm cov mob uas muaj raws noob caj noob ces hauv tsev neeg.

• Muaj tej yam hloov hauv noob caj noob ceg (genetic change) thiaj ua rau muaj tus mob 2-MBADD. Tag nrho cov tsev neeg Hmoob uas tau kuaj mas pom muaj kev hloov hauv lawv noob caj noob ceg ntawd zoo tib yam nkaus li. Cov tsev neeg Hmoob uas muaj tus mob 2-MBADD no tsis pom muaj mob nhyav li lwm tsev neeg uas muaj kev hloov txawv hauv lawv tsev neeg nob caj nob ces.

• Kuj tsis tau pom tus mob 2-MBADD yuav ua mob nhyav rau cov menyuam Hmoob uas muaj tus mob no. Tsis muaj ib tug yuav hlob taj. Pom muaj Ib tug ntawm cov menyuam ntawd hais lus tsis meej tiam sis tsis paub tseeb tias puas yog tim tus mob 2-MBADD los yog tim lwm yam. Kuj pom ob peb tug me nyuam muaj tej nqaij pob txha tsis muaj zog tiam sis thaum uas lawv hlob tuaj lawv kuj muaj zog lawm.

• Kev soj ntsuam rau xyoo 2005 no tau qhia txog plaub tug me nyuam uas muaj tus mob 2-MBADD. Peb tug me nyuam mos mas mob nhyav heev thiab hlob tsis zoo. Peb tug me nyuam no tsis yog Hmoob. Tus me nyuam plaub mas yog ib tug me nyuam nyab laj tab sis nws kuj hlob zoo.
  
  Raws li peb tau pom mas zoo li cov me nyuam Hmoob uas muaj tus mob 2-MBADD no tsis pom muaj mob nhyav thiab chiv mob lwm yam rau cov me nyuam. Tam sim no peb hais tsis tau meej, ua li mas cov me yuam uas muaj tus mob 2-MBADD no yuav tsum tau siv cov mis/khoom noj kom muaj protein tsawg thiab muaj carnitine los mus pab kho cov me nyuam no xwb.

Koj tsev neeg lub neej
Tam sim no koj tau ib tug me nyuam mos tshiab. Pab koj zoo siab! Peb foom lus zoo kom koj thiab koj tus me nyuam tau txais kev noj qab nyob zoo. Koj puas txhawj txog koj tus me nyuam vim nws muaj tus mob 2-MBADD? Koj cov kws kho mob kuj txhawj thiab, tiam sis qhov uas lawv paub txog tus mob 2-MBADD uas cov me nyuam Hmoob muaj mas kuj tsis ntshai luaj twg. Rau siab tu koj tus me nyuam. Saib ntsoov koj tus me nyuam kev loj hlob thiab nws yuav kawm ntau yam tshiab. Koj yuav tau ua tej yam li nram no los pab kom koj tus me nyuam tau txais kev noj qab nyob zoo.

Ua raws li koj tus kws kho mob thiab tus kws qhia noj haus qhia li no:

• Siv cov mis tshwj xeeb kom tsis txhob muaj protein ntau thiaj yuav muaj cov organic acid tsawg.

• Siv cov carnitine uas yuav hauj nrog cov organic acid thiaj yuav tsis ua mob rau koj tus menyuam.

• Coj koj tus me nyuam mus tom qhov chaw kho mob tsis tu ncua thiab kuaj ntsis nws kev loj hlob kev noj haus.

• Yuav ua li cas yog tias koj tus menyuam muaj mob. Qhov no muaj qhia rau nplooj ntawv sab nrauv.
   

Yog hais tias koj tus me nyuam muaj mob
Tej zaum kuj yuav muaj kev txhawj xeeb me ntsis tias tsam koj tus me nyuam yuav muaj mob nhyav uas luag hu ua “metabolic crisis”. Thaum muaj metabolic crisis mas vim cov organic acid thiab lwm yam hauv cov ntshav nce siab thiaj ua rau tus me nyuam mob nhyav. Tus me nyuam uas muaj metabolic crisis yuav tsum tau txais kev pab tam sim ntawv kom tsis txhob ua mob tsaug zog tsis xeev(coma). Cov me nyuam uas muaj hom mob 2-MBADD no mas yog lawv ho muaj mob los raug kab mob khaub thuas, ncauj tsuag noj tsis qab nyob tsis zoo xwb los lawv yuav mob nhyav heev taus.

Yog koj tus me nyuam muaj mob, mas txhob cia nws pw thawm hmo. Tsa koj tus me nyuam txhua 4 teev twg thiab muab li 2 ooj mis los yog kua txiv rau nws haus. Ua li no yuav ua rau tus me nyuam muaj zog thiab tiv thaiv kom tsis txhob muaj ua mob nhyav.

Thaum koj tus me nyuam muaj mob, koj yuav tau Faj ntsoov saib puas muaj cov tsos mob uas yuav chiv ua mob nhyav (metabolic crisis) rau koj tus me nyuam, xws li:

• Ntuav

• Tsaug zog looj lom thiab tsa tsis xav sawv

• Tsis qab los ntev tshaj ib hnub

• Tsis muaj zog, zaum los sawv ntsug tsis tau,

• Txhais caj npab thiab txhais ceg muag nthas

Yog hais tias koj tus menyuam muaj cov tsos mob li no mas coj koj tus me nyuam mus tim tsev kho mob ceev thiab kom lawv hu ib tug xov tooj ntawm no. Hauv Madison, hu 608-262-2122. Hauv Milwaukee hu 414-266-3347.
Kom lawv nrog ib tug kws kho mob uas paub txog metabolic tham.

Rau cov me nyuam yaus los yog thaum lawv mob lawm, lawv kuj yuav mob taus nhyav, tab sis kuj yuav tsis pom tshwm sim ntau. Lawv kuj yuav ua mob raws tib tug luj lwm li cov me nyuam mos thiab. Qhov xov zoo mas yog qhov tias, tam sim no kuj tseem tsis tau muaj ib tug me nyuam mos los sis cov menyuam yaus Hmoob uas muaj tus mob 2-MBADD no tau ua mob nhyav (metabolic crisis).

Yog koj muaj lus nug los muaj kev txhawj xeeb txog koj tus me nyuam tus mob 2-MBADD, thov hu los yog coj koj tus me nyuam mus tom tsev kho mob. Thaum koj pom hais tias muaj tej yam txawv txav lawm, koj tsis txhob ua siab nhyav, nrhiav kev pab koj koj tus me nyuam sai sai.

Yuav muaj dab tsi tshwm sim yav tom ntej
Ob peb xyoos tas los no, kuj kawm tau ntau yam txog tus mob 2-MBADD lawm; tab sis, cov me nyuam uas muaj tus mob 2-MBADD no kuj tseem yau heev. Tseem yuav muaj ntau yam kawm ntxiv txog tus mob 2-MBADD thaum uas cov me nyuam no hlob tuaj.

Thawj xyoo, koj tus me nyuam yuav loj hlob thiab hloov yam nws ua thiab noj haus. Thov coj koj tus menyuam mus tom tsev kho mob kom tsis tu ncua li tus kws kho mob hais. Ua li no, mas yuav soj ntsuam koj tus menyuam txoj kev loj hlob thiab xyuas seb puas yuav hloov nws tej kev noj haus. Thaum uas koj tus me nyuam hlob tuaj nws yuav noj tau ntau yam khoom noj. Tej khoom Hmoob noj, feem ntau yog mov, zaub ntxuag me ntsis nqaij. Noj li no mas tsis tshua muaj protein ntau. Tiam sis yog tias koj tsev neeg noj cov khoom As Mes Lis Kas ntau uas muaj nqaij thiab cheese mas yuav muaj protein ntau, ces cov organic acid yuav nce siab. Qhov chaw kho mob tshwj xeeb no yuav pab koj yoog koj txoj kev noj haus kom koj tus me nyuam tau txais kev noj qab nyob zoo.

Tom tsev kho mob me
Yog koj mus tom tsev kho mob khawv khuav mas koj yuav paub ntxiv seb muaj dab tsi tshiab txog tus mob 2-MBADD. Yog koj paub ntau mas yuav pab koj tu koj tus me nyuam kom zoo. Thaum pib paub txog thawj cov me nyuam Hmoob uas muaj tus mob 2-MBADD xyoo 2001 hauv lub xeev Wisconsin mas kuj xav hais tias cov kev kho kuj zoo kawg lawm, tab sis, kuj muaj kev hloov ntawm txoj kev kho zoo dua qub lawm. Koj yuav npaj siab tias tseem yuav muaj ntau yam hloov ntxiv. Cov kws kho mob hloov lawv txoj kev kho no vim hais tias lawv kawm tau tej yam tshiab los sis muaj tej yam dab tsi hloov ntawm koj tus menyuam. Thaum koj coj koj tus me nyuam mus kuaj tsis tu ncua, cov kws kho mob yuav nrhiav tau txoj kev kho koj tus me nyuam mas yam li koj kuj pab tho txoj hau kev rau ib tsoom Hmoob, yog leej twg muaj cov me nyuam li koj tus los lawv yuav pom qab kho. Qhov no yog ib qho paj tshab uas koj tau muab rau ib tsoom Hmoob lawm.

Thov kom koj tsev neeg tsuas ntsib kev noj qab nyob zoo.